Жалдагы үрөй учурган мушташ. Жаныбек Бапышов менен Калысбек Сейитбековдун соту башталды

Жалдагы үрөй учурган мушташка шектелип кармалган Жаныбек Бапышов менен Калысбек Сейитбековдун соттук иши башталды. Бул тууралуу SUPER.KG порталына Биринчи Май райондук сотунан билдиришти.

"Бизде соттук иш башталган. Бирок соттук отурумдар дайындалганы менен тараптар толук келбей, жылдырылып жатат. Кийинки отурум 31-июлга дайындалган, тилекке каршы ал күнү Курман айт майрамы болгондуктан дагы жылдырылат", - деди басма сөз кызматкери.

2019-жылдын 28-август күнү таңкы саат 07:00 чамасында Бишкектин Жал кичи районунда үрөй учурган мушташ орун алган. Тагыраагы, анда Ахунбаев менен Курчатов көчөлөрүнүн кесилишиндеги "Ярмарка" дүкөнүнүн жанынан эки жаран катуу сабалып, ооруканага жаткырылган. Бул окуя боюнча шектүүлөр 1985-жылы туулган Жаныбек Бапышов жана 1999-жылы туулган Калысбек Сейитбеков аттуу жарандар кармалган. Ал эми булардын бир тууган агасы Казыбек Бапышов 10-сентябрда кармалып, УКМКнын тергөө камагына киргизилген. 2019-жылдын 23-декабрында Казыбек Бапышовдун баш коргоо чарасы тергөөчүнүн өтүнүчү менен каралып, ал үй камагына чыккан.