Өлкөгө 14 миллиард сомдук дары-дармектер алып келинди, анын 2 миллиард сомдугу коронавирус илдетин айыктырууга зарыл каражаттар

Өлкөгө жалпы 14 миллиард 300 миллион 646 миң 148 сомдук дары-дармектер жана медициналык каражаттар алып келинди. Бул тууралуу Саламаттыкты сактоо министрлигинин алдындагы дары каражаттары жана медициналык шаймандар департаментинен маалымдашты.

Маалыматка ылайык, эми өлкөдө коронавирус инфекциясын дарылаганга зарыл болгон дары-дармектердин тартыштыгы жок. Жогоруда көрсөтүлгөн суммадагы дары каражаттардын ичинен 2 миллиард 100 миллион сомдугу коронавирус илдетин дарылоого зарыл болгон каражаттар.

Мындай иш-аракеттер мамлекеттик органдардын, жеке жана эл аралык уюмдардын, фармацевтикалык компаниялардын, ыктыярчылар, активисттер жана абалга көңүл кош карабаган бардык тараптардын жардамы менен ишке ашып жатканы белгиленет маалыматта. Муну менен катар эле ата мекендик дарыларды жана медициналык каражаттарды өндүрүүчүлөр өндүргөн товарынын көлөмүн көбөйттү. Департамент өлкөгө коронавирусту дарылоого керек болгон дарылар август айына чейин дагы алып келинери күтүлүп жатканын белгилейт.