Орусиялык миллиардер Алишер Усманов медицина кызматкерлеринин эмгек акысын төлөө үчүн Өзбекстанга дагы 10 миллион доллар бөлдү

Өзбекстанда төрөлгөн орусиялык миллиардер Алишер Усманов медицина кызматкерлеринин эмгек акысын төлөө үчүн Өзбекстанга дагы 100 миллиард сум (10 миллион доллар) бөлдү. Бул каражат жана мамлекеттик бюджеттен кошумча 100 миллиард сум, "Тез жардам" кызматкерлерин шыктандыруу үчүн бөлүнөт. Бул тууралуу коңшу өлкөнүн басылмалары жазып чыкты.

Өзбекстандын өкмөтүн тийиштүү чечимине ылайык, "Тез жардам" кызматынын коронавирус инфекциясынын таралышына каршы күрөшкөн кызматкерлерге төмөнкү өлчөмдө бир жолку материалдык сыйлыктар берилет:

Дарыгерлерге - 5 миллион сум (500 доллар);

Орто медицина кызматкерлерине - 4 миллион сум (400 доллар);

Айдоочуларга - 3 миллион сум (300 доллар).

Бул төлөмдөр үстүбүздөгү жылдын 1-июнуна чейин иштеген кызматкерлерге гана берилет.

66 жаштагы Алишер Усманов буга чейин дагы Өзбекстанга коронавируска каршы күрөшүү үчүн 20 миллион доллар бөлгөн.