Кытайлык дарыгер: "Жергиликтүү бийлик коронавирусту жаап-жашырууга аракет кылган"

Кытайдын Ухан шаарындагы коронавирус инфекциясын изилдөөгө катышкан кытайлык дарыгер Квок-Юн Юэн жергиликтүү бийлик коронавирусту жаап-жашырганын айтты. Бул тууралуу дарыгер Би-Би-Сиге берген маегинде айткан.

"Биз Хуанандагы базарга барганыбызда, көп деле нерсе жок болчу. Анткени базар ошол мезгилге чейин тазаланган болчу. Чындыгында оору чыккан жерде эч кандай далил болгон эмес. Ошондуктан вирусту кайсы жаныбар алып жүргөн жана адамга жуктурган дегенди таба алган жокпуз", - деген дарыгер.

Анын айтымында жергиликтүү бийлик далилдерди жок кылышып, дарыгерлердин тыянактарына өтө эле жай реакция кылышкан.

"Менин оюмча алар Ухандагы айрым маалыматтарды жашырышкан. Колдо болгон маалыматты тезинен өткөрүп берүү керек болгон жергиликтүү бийликтер буга даяр эмес экен", - деген Квок-Юн Юэн.

Буга чейин дагы гонконгдук вирусолог Ли-Мэн Ян Кытай жетекчилиги коронавирус жөнүндө алар кабарланганга чейин эле билишкендигин айткан.

Бүгүнкү күндө коронавирус дүйнөдө 671 миңден ашык адамдын өмүрүн алды.