Талас облусунун башчысынын жардамчысы велосипедчен адамды сүзүп алып, ал каза болду

Талас районунда кечээ, 30-июлда өкмөттүн Талас облусундагы ыйгарым укуктуу өкүлү Марат Мураталиевдин жардамчысы Марслатбек Шералиевдин катышуусундагы жол кырсыгы катталды. Бул тууралуу Жол кыймылынын коопсуздугун камсыздоо башкармалыгынан билдиришти.

Маалыматка ылайык кечээ, 30-июль күнү саат 17:30 чамасында Көк-Мойнок айылында Toyota runner унаасын 53 жаштагы Марслатбек Шералиев башкарып бара жаткан. Ал батыштан чыгышка карай бара жатып, жол жээгинде кетип бара жаткан велосипедчен адамды сүзгөн. Андан кийин жол четинде токтоп турган Мерседес-Бенц Гигант унаасын сүзүп токтогон.

Ал эми велосипед тээп бара жаткан жабырлануучу 23 жаштагы А.А. аттуу жаран болгон. Ал Манас райондук ооруканасына жеткирилген. Айдоочуну экспертизадан өткөрүшкөндө ал мас абалда болгону аныкталган.

Манас РИИБи бул фактыны Кылмыштардын жана жоруктардын бирдиктүү реестрине каттап, сотко чейинки өндүрүшкө алган. Унаа айып короосуна токтотулган.

Бүгүн, 31-июлда ооруканада жаткан жабырлануучу алган жаракаттарынан улам эсине келбей каза болду. Ал эми айдоочу убактылуу кармоочу жайга киргизилди.