COVID-19дан көз жумган адамдын жансыз денесин сойгон дарыгерге 1250 сом төлөнөт. Медкызматкерлердин компенсациялык төлөмдөрү көбөйтүлдү

Коронавирус боюнча республикалык штаб медициналык кызматкерлердин компенсациялык төлөмдөрү тууралуу маалымат таратты.

"Дарыгерлерге кошумча төлөнүүчү акынын механизми 4 категориядан турат. Азыркы учурда бир күнгө төлөнүүчү каражаттын өлчөмү жогорулады", - деп билдирди вице-премьер-министр Аида Исмаилова.
Анын айтымында, медкызматкерлердин 14 күн обсервацияда болуу мөөнөтү кайра каралып чыгып, 7 күнгө чейин кыскарган. Ал эми бир күнгө төлөнүүчү сумма өзгөрбөй – 900 сом бойдон калууда.

Биринчи категория: Казармалык режимде иштеген кызматкерлерге (жугуштуу оорулар бөлүмү, ПИТ бөлүмү, жандандыруу бөлүмү, вирусологиялык лабораториялар, обсерваторлор, мобилдик бригадалар) 1 сутка үчүн төлөмдөр жаңы механизм боюнча төмөнкүдөй:

Дарыгерлер – 3000 сом (30 пайызга көбөйдү);
Орто медперсонал – 2500 сом (25 пайызга көбөйдү);
Кенже медперсонал – 2200 сом (22 пайызга көбөйдү).

Ошондой эле бул категориядагы медкызматкерлерге обсервацияда жаткандыгы үчүн 900 сом төлөнөт. Анын өлчөмү 7 күн үчүн 6 миң 300 сомду түзөт.

Экинчи категория: Адаттагыдай режимде иштеген медкызматкерлерге (убактылуу түзүлгөн жерлерде, лабораториялар, блокпосттор, обсервация, мобилдик бригадалар) иштеген 1 сааты үчүн төлөмдөр:

Дарыгерлер – 130 сом;
Орто медперсонал –120 сом;
Кенже медперсонал - 100 сом.

Үчүнчү категория: "Тез жардам кызматында" иштегендерге кошумча акы COVID-19 вирусту жуктурган бир адамды жеткиргени үчүн төлөнөт:

Дарыгерлер – 750 сом;
Орто медперсонал – 600 сом;
Кенже медперсонал ТОП жана МОП – 500 сом.

Төртүнчү категория: Өлүкканаларда иштеген медкызматкерлерге кошумча акы COVID-19 вирусту жуктурган жансыз дененин бирөөнү сойгондугу үчүн төлөнөт:

Дарыгерлер – 1250 сом;
Орто медперсонал – 1000 сом;
Кичи медперсонал – 800 сом.