Орусиядан Казакстан аркылуу транзит менен Кыргыз жарандарын чыгарып кетүү боюнча макулдашуу жетишилди

Чет мамлекеттерден биздин жарандарды кайтаруу боюнча Кыргыз өлкөсүнүн президентинин жана өкмөтүнүн тапшырмасын аткаруунун алкагында, Кыргыз өлкөсү менен Казакстандын тышкы саясий мекемелеринин ортосунда Казакстандын аймагы аркылуу Орусиянын Оренбург облусунан Кыргыз жарандарын чыгарып кетүү үчүн кезектеги транзиттик коридор уюштуруп берүү макулдашуусу жетишилди. Бул тууралуу республикалык штабдан билдиришти.

Билдирүүгө ылайык, Кыргыз жарандарын Орусиядан кайтаруу автобустар колоннасы менен бир нече этапта ишке ашырылат. Биздин жарандар менен автобустардын биринчи колоннасы 3-августта кечинде келери күтүлүүдө.

Тышкы иштер министрлиги Орусияда болуп жаткан биздин жарандарды Орусия-Казакстан мамлекеттик чек арасы көздөй расмий ачылганга чейин барбоого чакырат.

Коронавирус инфекциясынын жайылышына каршы күрөшүү боюнча ыкчам штабдын чечимине ылайык, Орусия-Казакстан мамлекеттик чек арасында мекендештердин кезектеги топтолушун болтурбоо максатында Москвадан, Новосибирсктен жана Екатеринбургдан туруктуу негизде Орусиядан Кыргыз өлкөсүнө учкан чартердик каттамдардын саны олуттуу түрдө көбөйтүлдү.