Нарында суюк кычкылтекти жеткире турган борбордук систем ишке кирди

Нарын облустук бириктирилген ооруканасында суюк кычкылтекти стационарларга жеткире турган борбордук систем курулуп, ишке берилди. Бул тууралуу республикалык штабдан билдиришти.

Мындай систем кычкылтек концентраторлорун жана кычкылтек баллондорун алмаштыра турган жогорку сапаттагы медициналык тейлөөгө шарт түзөт. Суюк кычкылтек менен оорукананын ангионеврология, провизор, терапия, жугуштуу оорулар, кардиология бөлүмдөрүндөгү бейтаптар камсыздалат.

Кыргыз өлкөсүндө жакын арада гана пайда болгон кычкылтек станциясын куруу үчүн мамлекет тарабынан 5 миллион сомдун тегерегиндеги каражат жумшалган. Бул ишти “Бишкек Тех Газ” ачык акционердик коому ишке ашырды.

Нарын облустук бириктирилген ооруканасынын директору Чыңгыз Нарынбеков: “Борборлоштурулган суюк кычкылтек станциясынын коюлушу бейтаптарды дарылоодо абдан чоң жеңилдик бере баштады. Себеби бул станция аркылуу ар бир бейтап 99 пайыз суюк кычкылтек менен камсыз болот. Мындагы кычкылтектин запасы колдонууга жараша 1-2 айга жетери болжолдонууда”, - деп белгиледи.