"Баасы 26 миң доллар". Саламаттыкты сактоо министрлигине 5 "Тез жардам" унаасы берилди

"Ильшат" коомдук фонду тарабынан республикабыздын саламаттыкты сактоо уюмдарына бөлүштүрүп берүү үчүн керектүү медициналык жабдуулар менен жабдылган 5 "Тез жардам" унаасы сатып алынып, анын төртөө бүгүн Саламаттыкты сактоо министрлигине тапшырылды. Бир автоунаа буга чейин Ысык-Көл облусунун Чолпон-Ата шаарындагы аймактык ооруканага жеткирилген. Бул тууралуу аталган министрликтен кабарлашты.

Аталган фонддун өкүлү Тилек Жээнбековдун айтымында, ар бир автоунаанын наркы 26 миң АКШ долларын түзөт.

"Жаралган оор кырдаалга карабастан, өз күчүн, ден соолугун аябастан элибизге кызмат кылып жаткан дарыгерлерибизге «Ильшат» коомдук фондунун атынан ыраазычылыгымды билдирем. Саламаттыкты сактоо министрлигине тапшырылып жаткан бул "Тез жардам" автоунаалары илдет менен тынымсыз күрөшүп жаткан дарыгерлерибизге жардамы тийсин деген ниетте белек катары тапшырып жатабыз", - деди фонддун өкүлү Тилек Жээнбеков.

"Ушундай оор мезгилде керектүү жардам көрсөтүп жатканы үчүн «Ильшат» коомдук фондуна министрликтин атынан ыраазычылык билдирем. Тапшырылган "Тез жардам" унаалары балдар ооруканаларына ылайыктуу болгондуктан, 2 унаа Бишкек шаарындагы №3 шаардык клиникалык тез жардам балдар ооруканасына, 2 унааны Ош шаарындагы облустар аралык балдар ооруканасына тапшырууну туура көрүп жатабыз", - деп билдирди саламаттыкты сактоо министринин орун басары Мадамин Каратаев.