Мектепти гүлгө ороп, жашылдандырган жаран сыйланды

Бишкек шаарындагы №67 мектептин айланасын Рахматилла Амиров көп жылдан бери өз демилгеси менен жашылдандырып келет. Жашылдандырууга көп жылдык кол эмгегин, көз майын жумшаган эмгек ээсине Бишкек шаарынын мэриясы ыраазычылык билдирип, сый баракчасын тапшырды.

Бул тууралуу Бишкек шаарынын мэриясынын басма сөз кызматынын өкүлү Назгүл Жамгырчиева төмөнкүлөрдү айтты.

"Рахматилла Амиров менен бизди анын жакын таанышы байланыштырып, эмгеги тууралуу айтып берди. Биз анын шаардын кооздугун жаратуудагы, жашылдандыруудагы талыкпаган эмгеги үчүн ыраазычылык билдирип коюуну чечтик.

"Бишкек жашылчарба" муниципалдык ишканасынын башчысы Эльнура Жолдошева байкеге ыраазычылык баракчасын, биздин күнөсканадан үч кап өсүмдүк топурагын жана бакча топтомун тапшырды. Тургундардын жашыл демилгелерин колдоо жана алар менен чогу иштешүү үчүн биз байкени райондун агроному, устаты жана мураптары менен тааныштырдык. Рахматилла Амировго чоң рахмат", - деди басма сөз өкүлү.

Кошумчалай кетсек Рахматилла Амиров аталган мектептин айланасында жашабайт. Ал башка жактан келип, мектептин айланасын көп жылдан бери жашылдандырып келет.