Адамзаты дагы кандай апаат менен күрөшөт? Билл Гейтс коронавирустан да кооптуу апаатты айтты

"Microsoft" компаниясынын негиздөөчүсү, миллиардер жана филантроп Билл Гейтс атмосферанын булгануусун коронавирус пандемиясындай эле кооптуу экендигин айтты. Бул тууралуу дүйнөлүк жалпыга маалымдоо каражаттары жазды.

Билл Гейтс өз билдирүүсүндө климаттык апаат жакынкы он жылдыкта болорун айткан. Айтымында, экологияга байланыштуу глобалдык кризис планета үчүн оор сокку болот. Дүйнө эли өлүмдүн көп катталуусу жана экономикалык оор кризиске туш болот. "Коронавирус пандемиясы канчалык коркунучтуу болбосун, климаттын өзгөрүүсү андан да кооптуу болот", - деген ал.

Экологиялык апааттын кесепетинен өлүмдүн көп катталуусу жана экономикалык оор кризис коронавирус пандемиясынан да узакка созулушу мүмкүн. Анын болжолдуу эсептөөсүнө ылайык, 40 жыл аралыгында абанын температурасынын жогорулашынан каза болгондордун саны коронавирустан каза болгондордун санына барабар болот. Эгерде кылымдын аягына чейин экологиялык абал начарлай берсе, 100 миң кишиге 73 өлүм туура келип калат.

Ал эми 2100-жылы экологиялык апааттан каза болгондордун саны коронавирустан каза богондордон 5 эсе көп болот. Адамзаты учурда жүрүп жаткан пандемиядан сабак алып, келечекте күтүлүп жаткан экологиялык кризиске туруштук берүүгө даяр болуусун эскерткен.

Ошондой эле экологиялык кризистин алдын алуу иштерин инновациялык технологиясы өнүккөн алдыңкы өлкөлөр баштоосу керек. Коронавируска каршы вакцина эмки жылы даяр болсо, климаттын өзгөрүүсүн калыбына келтирүү 2 жылда да чечиле турган маселе эмес экендигин кошумчалаган.