Өлкөдө авариялык абалда турган мектептердин саны айтылды

“Республика боюнча 2019-жылы өкмөт тарабынан түзүлгөн комиссия авариялык мектептер катары тааныган 245 мектептин тизмеси түзүлгөн. Анын ичинен 117 мектеп авариялык абалда турат жана эч бир тизмеге киргизилген эмес. Калган мектептердин курулуш жана долборлоо иштерин каржылоо республикалык бюджеттин, башка фонддордун жана Бишкек менен Ош мэриясы тарабынан жүргүзүлүүдө”, - деп билдирди Архитектура, курулуш жана турак жай-коммуналдык чарба мамлекеттик агенттигинин директору Урматбек Кокочаров.

Анын айтымында, 2020-жылы бекитилген тизме боюнча республикалык бюджеттен 29 авариялык абалдагы мектептин курулушуна 353 миллион сом каралган. Ал эми 29 мектепти толук бүткөрүүгө 1475 миллион сом керектелет.

Бүгүнкү күндө курулуш иштери жүрүүдө. Андан сырткары коррупция менен күрөшүү боюнча бирдиктүү депозиттик эсептен бөлүнгөн каражаттын эсебинен 15 мектептин кошумча корпустарынын курулушу жүрүүдө.