Владимир Путин дүйнөдө биринчи жолу Орусияда коронавируска каршы вакцина каттоодон өткөндүгүн жарыялады

Орусияда коронавируска каршы вакцина дүйнөдө алгачкылардан болуп каттоодон өттү. Бул тууралуу Орусиянын президенти Владимир Путин өкмөт менен жолугушуу учурунда билдирген.

"Менин билишимче, Орусияда бүгүн дүйнөдө биринчи жолу коронавирус инфекциясына каршы вакцина каттоодон өттү. Мен вакцина натыйжалуу иштей тургандыгын, туруктуу иммунитетти түзөрүн айтат элем. Кайталап айтам, вакцина бардык керектүү текшерүүлөрдөн өттү", - деген Путин.

Мындан тышкары ал Саламаттыкты сактоо министрлигинин башчысы Михаил Мурашкодон вакцина тууралуу толук маалымат берүүсүн өтүндү.

Өз кезегинде Путин биринчи коронавирус вакцинасын иштеп чыккан адамдардын бардыгына ыраазычылык билдирди жана аны бүт дүйнө үчүн өтө маанилүү кадам деп атады. Ал Орусиядан кийин башка өлкөлөр дагы вакциналарды чыгара тургандыгына үмүт артарын билдирди.