Нарын облусунда жаңы окуу жылына даярдыктар көрүлүүдө

Нарын облусунда жаңы окуу жылына даярдыктар көрүлүүдө. Бул тууралуу өкмөттүн Нарын облусундагы ыйгарым укуктуу өкүлүнүн орун басары Жаркын Ибраева брифингде билдирди.

"Нарын облусу боюнча 142 мектепте жаңы 2020-2021-окуу жылына даярдыктар кызуу жүрүүдө. Санэпидемборборунун уруксаты болсо, 36 мектеп бүгүнкү күндө реалдуу окутууга даяр. Быйыл 1-класска 5 миң 764 окуучу келет деп күтүп жатабыз. Окуулар кандай тартипте башталаары азыр такталууда", - деди ал.

Анын айтымында, 142 мектептен 91 мектеп интернетке кошулган. 15 мектепти интернетке кошуу иштери жүрүп жатат. Ал эми 6 мектеп географиялык жайгашуусуна байланыштуу интернет кошууга техникалык мүмкүнчүлүк жок.

"Азыркы учурда облуста 6 мектептин, 2 бала бакчанын курулуш иштери жүрүп жатат. Андан тышкары 70 орундуу оорукананын курулушу башталды. Жалпы облус боюнча курулуучу 11 объектке 41 миллион сом каржылоо ачылды", - деп кошумчалады Жаркын Ибраева.