Эл акыны Гүлсайра Момунова каза болду

Кыргыз Республикасынын Эл акыны Гүлсайра Момунова каза болду. Бул тууралуу Кыргыз Республикасынын Улуттук жазуучулар союзунан билдиришти.

Маалыматка ылайык, акын узакка созулган оорудан улам каза болгон.

"Гүлсайра Момунова көптөн бери ооруп жүргөн. Акындын сөөгү "Ала-Арча" көрүстөнүнө коюлары белгилүү болду", - деп билдирди акындын кесиптеши.

Гүлсайра Момунова Талас облусуна караштуу Бакай-Ата районунда 1937-жылы 30-декабрда туулган. 1955-жылы орто мектепти, 1960-жылы В.В.Маяковский атындагы Кыргыз кыз-келиндер институтун бүтүргөн.
1961-1969-жылдары "Советтик Кыргызстан" гезитинде кызматкер, 1971-жылдан "Кыргызстан" басмасында редактор, 1973-1993-жылдары "Кыргызстан аялдары" журналында жооптуу катчы, башкы редактордун орун басары;

Биринчи ырлар жыйнагы "Тилек" деген аталышта 1964-жылы жарык көргөн. Бир катар поэтикалык кыргыз тилиндеги жыйнактардын, эки орус тилине которулган жыйнактардын автору болгон.

1971-жылдан Жазуучулар союзунун, 1965-жылдан СССР Журналисттер союзунун мүчөсү.
Кыргыз ССРинин Жогорку Советинин Ардак Грамотасы менен сыйланган.
1987-жылдан "Кыргыз Республикасынын маданиятына эмгек сиңирген ишмер" наамын алган.

2001-жылы "Эр Манас урпагы" медалы менен сыйланган.

2003-жылы "Түгөлбай Ата" адабий сыйлыгынын лауреаты;

2011-жылы Кыргыз Республикасынын Эл акыны наамын алган.

SUPER.KG порталынын эмгек жамааты акын Гүлсайра Момунованын көз жумганына байланыштуу үй-бүлөсүнүн жана жакындарынын аза кайгысын тең бөлүшүп, терең кайгыруу менен көңүл айтат.