Мэриянын долбоорунун алкагында унаа токтотуучу жайдын курулушу боюнча кылмыш иши козголду

Борбор калаада акы төлөнүүчү унаа токтоочу жайларды уюштуруу жаатында мамлекеттик жеке өнөктөштүктүн долбоору боюнча кылмыш иши козголду. Аталган долбоор Бишкек мэриясы тарабынан 2016-жылы башталган. Бул тууралуу Бишкек шаарынын мэринин орун басары Азиз Алымкулов брифинг учурунда айтты.
Анын айтымында, долбоорду ишке ашыруу үчүн бюджеттен 9 миллион сом бөлүнүп, тендер жарыяланган жана испаниялык компания жеңүүчү деп аныкталган.

"Бирок биз мамлекеттик жеке өнөктөштүктүн долбоору боюнча чыныгы ишти көрө алган жокпуз. Буга тиешелүү бардык документтерди изилдеп чыктык. Биз жеңүүчүнүн, ошондой эле ага катышкан бир катар адамдардын иши өз деңгээлинде аткарылган эмес деп эсептейбиз.

Биз жүйөөлөрүбүздү укук коргоо органдарына жөнөттүк, алардын үстүнөн кылмыш иши козголуп, тергөө амалдары жүрүп жатат. Укук коргоо органдары көйгөйлөрдү аныктап жана Мамлекеттик-жеке өнөктөштүк (МЖӨ) долбоору эмне үчүн иштебей тургандыгын аныктайт", - деди Алымкулов.

Ал белгилегендей МЖӨ долбоорун ишке ашыруу токтоп калбайт жана жылдын аягына чейин 8 миңге жакын жайларды түзүү пландалууда.

"Келечекте МЖӨ алкагында биз акы төлөнө турган жерлердин максималдуу санын - 50 миңге чейин уюштурууну пландап жатабыз", - деп кошумчалады вице-мэр.