Вице-премьер орусиялык медицина кызматкерлерине көрсөтүлгөн көмөгү үчүн ыраазычылык билдирди

Вице-премьер-министр Аида Исмаилова орусиялык медицина кызматкерлерине көрсөтүлгөн көмөгү үчүн ыраазычылык билдирди. Бул тууралуу өкмөттүн басма сөз кызматынан кабарлашты.

Бүгүн Кыргыз Республикасына коронавирустук инфекцияга каршы күрөшүүгө көмөк көрсөтүү үчүн келген орусиялык дарыгерлердин миссиясы жыйынтыкталды.

"Убакыттан пайдалануу менен Кыргыз өкмөтүнүн жана өлкө тургундарынын атынан орусиялык дарыгерлерге COVID-19 дартына каршы күрөшүүгө өз учурунда көрсөткөн жардамы үчүн ыраазычылык билдирем. Өлкөгө келген алгачкы күндөн тарта орусиялык дарыгерлер эң татаал жана жооптуу тилкелерде иш алып барышты. Алар тарабынан көлөмдүү иш аткарылды. Врач-эпидемиологдор, инфекционисттер жана башка багыттагы адистер кыргыз кесиптештери менен биргеликте коронавирустук инфекцияга каршы күрөшүүдө практикалык көмөк көрсөтүштү. Сиздердин жардамыңыздардын натыйжасында инфекциянын толкунун жайгарууга мүмкүндүк болду", - деп белгиледи вице-премьер-министр.

Орусиялык врачтар Кыргыз Республикасынын президентинин жана Орусия Федерациясынын президентинин ортосунда жетишилген макулдашуулардын алкагында иш алып барышкан.