Балыкчыда жаш медицина кызматкерлерине эмгек маянасынан сырткары ай сайын 3 миң сом каражат бөлүнүп берилет

Балыкчы шаарынын медицина мекемелеринде жана билим берүү бөлүмдөрүндө эмгектенип жаткан жаш адистерге жергиликтүү бюджеттин эсебинен айлык маянасынан тышкары кошумча каражат бөлүнүп берилет. Бул тууралуу Балыкчы шаардык мэриясынын басма сөз кызматынан билдирди.

"Мектептерде, бала бакчаларда,балдар спорт мектебинде иштеп жаткан жаш адистерге материалдык колдоо көрсөтүү максатында, жергиликтүү бюджеттин эсебинен ар бир жаш адиске 1 миң сом өлчөмүндө ай сайын эмгек маянасынан сырткары кошумча каражат, ал эми шаардык үй-бүлөлүк медицина борборунда, аймактык шаардык ооруканада, ооруларды алдын алуу жана санитардык эпидемиологиялык көзөмөлдөө борборунда, тиш дарылоо бейтапканасында иштеп жаткан адистерди материалдык колдоо көрсөтүү максатында, жергиликтүү бюджеттин эсебинен 3 миң сом өлчөмүндө ай сайын эмгек маянасынан сырткары бөлүп берилүүдө", - деп айтылат маалыматта.

Маалыматта Балыкчы шаары боюнча жыл ичинде бардыгы болуп жергиликтүү бюджеттен ушул күнгө чейин 469 миң сом төлөнүп берилгени кошумчаланат.