Ливанда өзгөчө абал режими дагы бир айга узартылды

Бейрут шаарындагы порттогу ири жарылууга байланыштуу Ливан өлкөсүндөгү өзгөчө абал режими дагы бир айга узартылды. Бул тууралуу чет элдик маалымат булактары жазып чыгышты.

Жарылуу 4-августта болуп, ошол күнү эле өзгөчө абал режими 2 жумага узарган болчу. Ал эми бул жарылууга байланыштуу эл аралык иликтөө жүргүзүү сунушуна Ливандын бийлиги макул болбогону кабарланып жатат.

Ал күнү Ливандын борбору Бейрут шаарындагы портто 2 миң 750 тонна аммиак селитрасы жарылып, 15 миллиард доллардан ашык зыян келтирилген. Акыркы эсеп боюнча окуянын кесепетинен 177 адамдын өмүрү кыйылып, 6 миңдей адам жаракат алган.