Өкмөт башчы: "Коомдук унаанын иштөө графиги кайра каралып чыгат"

Эгерде биринчи чейректен кийин эпидемиологиялык абал жакшырса, анда мектептер ишмердүүлүгүн толук кандуу ишке ашырылат. Бул тууралуу премьер-министр Кубатбек Боронов бүгүн, 19-августта брифингде билдирди.

Ал ошондой эле окуу жылынын башталышы менен коомдук унаанын иштөө графиги кайра каралып чыгарыларын белгиледи.

"Акыркы учурда интернет айдыңында салынып баштаган ооруканалар белгиленген мөөнөттөрүндө бүтпөй калат деген кооптуу маалыматтар чыгып жатат. Биз буга чейин аймактарда жана Бишкек, Ош шаарларында жалпы 12 объект курулуп жатканын кабарлаганбыз, аларга дагы 2 оорукана кошулду. Жалал-Абад шаарында жана Кара-Суу районундагы Чайчы айылында.

Учурда 14 оорукананы куруу жана реконструкциялоо боюнча иш жүрүп жатат. Мен өкмөт башчы катары баарыңыздарды ишендирип кетем. Ооруканалар боюнча белгиленген курулуш иштери аба ырайына байланыштуу гана кээ бир объекттилер 4-5 күнгө кечиктирилип калбаса, сөзсүз курулуш аягына чыгарылат", - деп билдирди Боронов.

Анын айтымында, бардык ооруканалар медициналык жабдыктар менен толук жабдылып, тийиштүү персонал ишке тартылат. Бул боюнча бардык иштер жигердүү жүрүп, көзөмөлдө турат.