Жети-Өгүздө эс алуучулар менен официант кыздын ортосунда чыккан чыр боюнча милиция түшүндүрмө берди

Ысык-Көлдөгү кафе катары тейленген боз үйдө официант кызга жана кардарларга белгисиз адамдар тарабынан кол көтөрүү фактысы боюнча сотко чейинки өндүрүш иши башталды. Бул тууралуу Ысык-Көл ОИИБинин басма сөз кызматынан билдирди.

Анда тергөө иштеринин жүрүшүндө окуя тууралуу төмөнкүлөр аныкталган.

"Ушул жылдын 8-августунда Бишкек шаарынын 53 жаштагы тургуну Б.Н. анын 55 жаштагы жолдошу М.А. жана бир туугандары 61 жаштагы Б.С. менен 56 жаштагы Б.Б. 41 жаштагы Б.А. жана башка жакын туугандары болуп Барскоон шаркыратмасынын жанында эс алып жатышкан.

Алар "Ак Марал" боз үйүнө кирип, анда Б.Н. боз үйдүн ичин видеого тарта баштаган.Тейлөөчү кыз мүнкүн эместигин түшүндүргөн. Ошол маалда официант кыз экөөнүн ортосунда пикир келишпестик жаралып, бири-бирине кол көтөрүшкөн. Б.Н.нын туугандары ага болушуп урушка аралашкан. Ал учурда боз үйдө отурган 33 жаштагы С.С. аттуу башка кардар урушкандарды ажыратам деп, денесине бир нече жолу сокку алган. Бүгүнкү күндө соттук-медициналык экспертизанын жыйынтыгы чыккан. Анын негизинде мыйзам чегинде чара көрүлөрү маалымдалат. Ошондой эле урушка катышкан үч тарап тең милицияга арыз менен кайрылган. Үч арыз тең Кылмыштардын жана жоруктардын бирдиктүү реестрине катталган",- деп жазылат маалыматта.

Буга чейин жергиликтүү басылмалар Ысык-Көлдөгү боз үйдө кардарлар менен официанттын пикир келишпестигинен улам келип чыккан урушту чагылдырган видеону жарыялашкан. Анда окуяда жашы жете элек балдарга да кол көтөрүлгөнү тууралуу маалыматта айтылган.