Кубатбек Боронов Ысык-Көл райондук аймактык ооруканасынын жугуштуу оорулар бөлүмүн капиталдык реконструкциялоонун жүрүшү менен таанышты

Премьер-министр Кубатбек Боронов Ысык-Көл облусуна жасаган иш сапарынын алкагында Чолпон-Ата шаарындагы Ысык-Көл райондук аймактык ооруканасынын жугуштуу оорулар бөлүмүн капиталдык реконструкциялоо иштеринин жүрүшү менен таанышты. Бул тууралуу өкмөттүн басма сөз кызматынан билдиришти.

Оорукана 1986-жылы курулган. Бул убакыт аралыгында капиталдык оңдоп-түзөө иштери жүргүзүлгөн эмес. Учурда медициналык жайдын 15 орундуу бир бөлүгү иштеп жатат. Бөлүмдү 100 орунга чейин кеңейтүү жана чатырын алмаштыруу иштери жүрүүдө. Учурда жумуштардын 80 пайызга жакыны бүттү.

Премьер-министр саламаттыкты сактоо мекемеси белгиленген мөөнөттө толук кандуу ишке берилиши керектигин белгиледи.

"Капиталдык ремонттон өтүп жаткан ооруканын жандандыруу бөлүмү жана интенсивдүү терапия бөлүмдөрү тийиштүү медициналык жабдуулар менен камсыз кылынышы керек. Оңдоо иштери сапаттуу жүргүзүлүүгө тийиш", - деди Кубатбек Боронов.

Муну менен катар өкмөт башчы эпидемияга каршы иш-чараларды күчөтүүгө, дарыгерлерди өз маалында бардык зарыл болгон каражаттар жана тийиштүү төлөмдөр менен камсыз кылууга өзгөчө көңүл бөлүү зарылдыгын белгиледи.