Көптөгөн кайрылуулар келип түшкөн. Муфтият Штабдан мечиттердин ишин жандантууга уруксат берүүнү өтүндү

22-августта Республикалык ыкчам штабдын кезектеги жыйыны болуп өткөнүн өкмөттүн маалымат кызматы кабарлады. Анда Кыргыз Республикасынын Дин иштери боюнча мамлекеттик комиссиясы аларга жарандардан мечиттердин ишин жандандыруу өтүнүчү менен көптөгөн кайрылуулар келип түшкөндүгүн билдирген. Комиссия жетекчиси Кыргыз мусулмандарынын дин башкармалыгы диний мекемелердеги тийиштүү санитардык коопсуздук нормалардын такыр сакталышын камсыздоо боюнча милдеттенмени өзүнө алууга даяр экенин айтты.

"Талкуу жыйынтыгы боюнча биринчи вице-премьер-министр Алмазбек Батырбеков Саламаттык сактоо министрлигине Дин иштери боюнча мамлекеттик комиссиясы жана Мусулмандар дин башкармалыгы менен биргеликте кыска мөөнөттө тийиштүү санитардык коопсуздук алгоритмин иштеп чыгууну, андан соң иштелип чыккан алгоритмге ылайык санитардык-гигиеналык нормалардын так сакталышын эске алуу менен диний мекемелердин ишин жандандырууга уруксаат берүү жөнүндө маселени иштеп чыгууну тапшырды", - деп жазылат маалыматта.