"Коронавирустан итибизден бери коркуп калды" дейт Түштүк Кореяда иштеген Жылдыз айым

SUPER.KG порталынын элдик кабар бөлүмүнө Түштүк Кореянын Кванжу шаарында иштеген Жылдыз айым кайрылды. Анын айтымында, учурда Түштүк Кореяда коронавирус инфекциясы кооптуу болуп жатат жана уюлдук телефондорго саат сайын эскертүүлөр келип турат.

"Менин атым Жылдыз. 31 жаштамын. Жалал-Абад облусунун Базар-Коргон районунан болом. Түштүк Кореяга келгениме 3 жылдан ашып калды. Келгенден бери кафеде иштеп жатам. Карантин киргизилгенден бери бизге аябай жаман болуп жатат. Кафеге ар кандай адамдар келет экен. Кимисинде вирус бар же жогун билбей, аман-эсен бала-чакабызга жетели деп иштеп жүрөбүз.

Бул жакта коронавируска карата катуу чаралар киргизилген. Мен иштеген жерди эле айтсам, кардар тамак келгенче бет капсыз отурса айып салынат. Уюлдук телефонубузга аябай көп эскертүүлөр келип жатат. Бүгүн, 23-августтан баштап Кванжу шаарындагы коомдук жайлар жабылат деп дагы айтып жатышат. Сыналгыдан коронавирус жөнүндө гана берип калышты. Бул жактын эли аябай бир нерсеге кылдат мамиле кылгандыктан, үйдөн чыкпагыла десе жымжырт болуп калат.

Кудайга шүгүр. Өлкөбүздө абал турукташып калды деп угуп жатабыз. Кыргыз элим баарыңыздар аман болуңуздар. Түштүк Кореядан салам!", - деген Жылдыз айым.