"Башка эркектер ага көз чаптырышын каалабайм". Өзбекстанда күйөөсү аялынын сулуулугу үчүн ага өрт коюп жиберген

Коңшу Өзбекстандын Самарканд шаарында аялынын сулуулугу үчүн ага өрт коюп жиберген жаран 6 жылга эркинен ажыратылды. Бул тууралуу аталган өлкөнүн басылмалары жазышууда.

Маалыматка ылайык, 36 жаштагы өзбекстандык жаран аялы сулуу болгон үчүн ага бензин чачып, өрт коюп жиберген. Сотто айыпталуучу: "Мен аялымдын сулуулугун башка эркектер карап жатканын каалабайм. Ошон үчүн ушундай кадамга бардым", - деген.

Ал аялы буга чейин көзүнө чөп салбагандыгын жана эми аны эч ким карабай тургандыгын айткан.

Аялы денесинен 25 пайыз күйүк алып, 1 айдан ашык комада жаткан. Ал учурда күйөөсүнө мындан дагы оор жаза берүүнү суранууда.

Буга чейин дагы Өзбекстанда күйөөсү өзүнүн унаасын ичинен бекитип, аялы, балдары менен кошо өрт койгон. Жыйынтыгында унаадагылардын бардыгы каза болушкан.