Бишкек мэриясы шаарда төрт миңден ашык жер пайдалануу эрежелери бузулганын аныктады

Бул жылы муниципалдык аймактагы объектилерге инвентаризация жүргүзүү беш этаптан өткөрүлгөндүгү тууралуу Жер пайдалануу жана курулуш башкармалыгынын башчысынын убактылуу милдетин аткаруучу Азамат Кадыров онлайн-брифирнгде билдирди.

"Бишкек шаарынын аймагындагы жер пайдалануу жана курулуш эрежелеринин сакталышына жооп берген башкармалык, курулуш эрежелери бузулган учурда башкармалык жана "Тазалык" муниципалдык ишканасы мыйзамсыз орнотулган объектилерди сүрдүрүшөт", - деген Азамат Кадыров.

Муниципалдык менчик объектилерин инвентаризациялоону өткөрүү боюнча атайын комиссия 17 миң 267 объект жайгашкан 13 миң 947 гектарга жакын аянттагы аймакты текшеришкен.

Анын ичинен 4 миң 247 жер пайдалангандыгы жана курулуш эрежелери бузулгандыгы аныкталган. Жер пайдалануу жана курулуш башкармалыгында иш кагаздарын жүргүзүү толугу менен автоматташтырылган маалыматтык системге киргизилген. Ошондой эле бардык объектилердин толук маалыматтары көрсөтүлгөн мобильдик тиркеме иштелип чыккан.

Бишкек мэриясы эгерде, мыйзамсыз же белгиленбеген жерге орнотулган объектини көрсөңүздөр 0 703 63-38-33 номерине билдирип коюуңуздарды суранат.