ЖКда Азиз Батукаевге байланыштуу токтомду кароону талап кылышууда

ЖКда депутат Туратбек Мадылбеков “мыйзамдагы ууру” Азиз Батукаевдин мөөнөтүнөн мурда бошотулуп, өлкөдөн чыгып кеткендиги тууралуу маселени ЖКнын бүгүнкү, 18-сентябрдагы жыйынында кароону сунуштады. "Премьер-министр Жантөрө Сатыбалдиев бүгүн келип, токтомдун аткарылышы тууралуу отчёт берсин",- деди эл өкүлү. Өз кезегинде төрага Асылбек Жээнбеков буга байланышкан токтом тармактык комитеттерге жөнөтүлгөнүн айтты. “Эгерде комитеттердин төрагалары бүгүн караганга даяр болушса, анда бул маселени карайлы”,- деди төрага. Эл өкүлү Туратбек Мадылбеков комитеттердин жетекчилерине белгилүү бир мөөнөт коюу керектигин айтып: “Болбосо токтомду кароо 30-декабрга чейин созула бериши мүмкүн. Бул токтомду кароо сентябрь айынын календардык планына кирген да”,- деди. Белгилей кетсек, парламенттин 30-майдагы жыйынында “мыйзамдагы ууру” Азиз Батукаевдин абактан мөөнөтүнөн мурда бошотулушун жана өлкөдөн чыгып кетишин иликтеген депутаттык комиссиянын иш жыйынтыгы боюнча Жогорку Кеңештин токтому кабыл алынган.