Бишкектен Ошко бара жаткан унаа кырсыкка кабылып, 3 адам кайтыш болду. Арасында эне, бала да бар

Бишкек-Ош жолунда жеңил унаа кырсыкка кабылды. Кырсыктын кесепетинен эне, бала жана 17 жаштагы өспүрүм окуя болгон жерден каза болсо, дагы 2 жаран жаракат алды. Маалыматты Ош облустук жол кыймылынын коопсуздугун камсыздоо башкармалыгынын басма сөз кызматынан билдиришти.

"Адам өмүрүн алган кырсык 1-сентябрда саат 21:30 чамасында Бишкек-Ош унаа жолунун 450-чакырымында катталган. Анда Бишкектен Ошту карай бара жаткан Тойота Виш унаасынын айдоочусу рулга ээ боло албай, унаа жолдон чыгып, оодарылып кеткен. Унааны Өзгөн районунун 1990-жылы туулган А.А. аттуу тургуну башкарып бара жаткан. Кырсыктын кесепетинен 2003-жылы туулган Б.Ж., 1995-жылы туулган А.Т. жана анын 2019-жылы туулган кызы каза болгон. Ал эми айдоочу жана айдоочунун 2016-жылы туулган уулу А.Э. Таш-Көмүр аймактык ооруканасына кайрылып, хирургия бөлүмүнө жаткырылган", - дешти мекемеден.