Бириккен улуттар уюму балдар үчүн жашоого эң мыкты өлкөлөрдү атады

Бириккен улуттар уюмунун балдар фонду жүргүзгөн изилдөөсү менен балдардын бакубаттуулугу боюнча өлкөлөрдүн рейтинги жарыяланды. Бул тууралуу дүйнөлүк басылмалар жазып чыгышты.

Маалыматка ылайык, эксперттер дүйнөнүн 41 өлкөсүндөгү балдар арасындагы психикалык жана физикалык ден соолук, академиялык даярдык жана социалдык көндүмдөрдүн көрсөткүчтөрүн салыштырып көрүшкөн.

Изилдөөнүн жыйынтыгында адистер биринчи орунга Нидерландия өлкөсүн коюшкан. Аталган өлкөдө балдар өзүн эң жакшы, бакубаттуу сезишет деген тыянакка келишкен.

Фонд түзгөн жалпы рейтингдеги экинчи жана үчүнчү орундарды Дания менен Норвегия ээлесе, төртүнчү жана бешинчи орунду Швейцария менен Финляндия ээлеген.

Нидерландия мындан сырткары балдар өз жашоосуна эң көп канааттанган өлкөлөрдүн тизмесинде биринчи орунду ээлейт. Мындай балдардын бул өлкөдөгү үлүшү 93 пайызды түзөт.

Балдардын жашоосунан канааттануунун жогорку деңгээли Мексикада 86 пайыз, ал эми Румынияда болсо 85 пайыз, Финляндияда 84 пайыз, ошондой эле Хорватия, Швейцарияда, Испанияда жана Литвада 82 пайыз катталган.