Таласта жаңы мечит пайдаланууга берилди

Талас облусунун Кара-Буура районуна караштуу Жоон-Дөбө айылында “Хазрети Хамза” атындагы заманбап үлгүдөгү мечит ачылып, пайдаланууга берилди. Бул тууралуу Муфтияттын басма сөз кызматынан билдиришти.

Билдирүүгө ылайык, ачылыш аземине Жогорку Кеңештин төрагасы Дастанбек Жумабеков, Талас облусунун башчысы Марат Мураталиев, Кара-Буура районунун акими Баратбек Сыдыкназаров, Талас облусунун мусулмандар казысынын орун басары Касым Сыдыков жана айылдын тургундары катышты.

Талас облусунун казысынын орун басары Касым Сыдыков өз сөзүндө жаңы курулган мечиттин ачылышы менен жергиликтүү тургундарды куттуктап, мечит ыймандын, адеп-ахлактын, ынтымактын башаты болуучу жайга айланышын айтып, элди ынтымакка жана биримдүүлүккө чакырды.

Белгилей кетсек, мечит “Ассанаабиль” кайрымдуулук фонду тарабынан курулган.