Бишкектеги жана Ысык-Көлдөгү балдар ооруканаларында орундар жетишсизби? Министрликтин жообу

Өлкөнүн Саламаттыкты сактоо министрлиги акыркы күндөрү мессенжерлер аркылуу тараган "Бишкек шаарында жана Ысык-Көл облусундагы медициналык жайларга балдар оор абалда көп кайрылып, бейтапканаларда орундар жетишсиз болуп жатат" деген билдирүүнү төгүндөп, жалган экенин эскертет.

Министрликтин маалыматына ылайык, бүгүнкү күндө бардык балдар ооруканалары кадимки режимде иштеп жатат, эч кандай балдардын эпидемиясы жок.

"Бишкекте COVID-19 менен ооругандар Республикалык клиникалык инфекциялык ооруканасында жана №6 Бишкек клиникалык ооруканасында дарыланып жатышат. №6 бейтапкананын жетекчилигинин айтымында, 120 керебеттин 42си бош. Республикалык клиникалык жугуштуу оорулар ооруканасы COVID-19 менен ооругандар үчүн 204 керебет каралганын белгиледи. Анын ичинен бош орундардын саны 150. Бишкек шаардык балдардын клиникалык тез жардам ооруканасында балдар үчүн жалпы 400 керебет каралса, анын 60ка жакыны бош.

Саламаттыкты сактоо министрлигинин Ысык-Көл облусу боюнча координатору Мира Кыдырбаева облуста балдарды кабыл алуу үчүн жалпысынан 121 керебет уюштурулганын, анын 115 керебети бош экенин кабарлады", - деп айтылат маалыматта.