Сизге кайсы күүлөр жагат? Кыргыз өлкөсүндө Комуз жумалыгы онлайн өтөт

Кыргыз өлкөсүндө Комуз жумалыгы 7-сентябрдан 13-сентябрга чейин эпидемиологиялык абалды эске алуу менен онлайн форматта өтөт. Бул тууралуу Маданият маалымат жана туризм министрлигинин басма сөз катчысы Айнура Асанбаева SUPER.KG порталына билдирди.

"Программада залкар комузчуларды эскерүү, салттуу музыка өнөрүн алып жүрүүчүлөрдүн жана комузчулардын катышуусу менен илимий-практикалык конференция, ошондой эле залкар жана жаш комузчулардын катышуусу менен “Таңшы комуз” онлайн концерти жана видео сабактар өтүп, ал “Маданият.Тарых.Тил” каналы жана Маданият, маалымат жана туризм министрлигинин Фейсбук баракчалары аркылуу түз көрсөтүлөт", - деп билдирди Айнура Асанбаева.

Эске салсак, “Комуз күнү” Кыргыз өлкөсүндө 9-сентябрда белгиленет. Аталган майрам элдин биримдигин бекемдөөгө жана коомчулукту бириктирүү максатында белгиленип келет.

Ошондой эле Маданият министрлигинен өлкөдөгү бардык жарандар аталган жумалыкка катыша аларын билдиришти. Ал үчүн Фейсбук жана Инстаграм аркылуу #ТаңшыКомуз хештегин колдонуу менен видео жарыялоо жетиштүү.