АКШ өзбекстандык журналист Бобомурод Абдуллаев боюнча тынчсызданып жатканын билдирди

АКШ Кыргыз өлкөсүндө кармалып, кийин Ташкентке экстрадицияланган өзбекстандык журналист Бобомурод Абдуллаев боюнча тынчсызданып жатканын билдирди. Бул тууралуу АКШнын маалымат булактарына таянуу менен коңшу Өзбекстандын басылмалары жазып чыгышты

Маалыматта АКШнын Кыргыз өлкөсүндөгү элчиси тараткан билдирүүдө Абдуллаев Ташкентте бошотулганы менен анын макамы дагы эле түшүнүксүз бойдон калып жатканы жазылган.

"Вашингтон Өзбекстандын президенти Шавкат Мирзийоевди журналисттердин оюн эркин билдирүү укугун сыйлоого жана Абдуллаевге каалаган жагына барууга уруксат берүүгө чакырды. Ошондой эле АКШ Кыргыз өлкөсүнүн Улуттук коопсуздук боюнча мамлекеттик комитети (УКМК) Абдуллаевди кыйноого алганы боюнча кабарга дагы тынчсызданган", - деп жазылат маалыматта.

Бобомурод Абдуллаев УКМКнын кызматкерлери тарабынан кыйноого кабылганын өзбек укук коргоо органдары аны үй камагына бошоткондон кийин ачык кат жазып, анда кыйноолор тууралуу айткан. Буга байланыштуу анын Кыргыз өлкөсүндөгү жактоочуларынын бири Башкы прокуратурага арыз менен кайрылган.

Эске салсак, Бобомурод Абдуллаев 9-агустта Бишкек шаарындагы кафелердин биринен кармалып, кийин УКМК тарабынан Өзбекстанга өткөрүп берилген. Кийин журналист туура жүрүм-туруму жөнүндөгү тил каттын негизинде бошотулганы маалымдалган.

Маалым болгондой, журналистке Өзбекстандын укук коргоо органдары Жазык кодексинин 158-беренеси («Өзбекстан Республикасынын президентине зыян келтирүү»), 159-беренеси («Өзбекстан Республикасынын конституциялык түзүлүшүнө зыян келтирүү») деген айып тагып келет.