Президент Алмазбек Атамбаев Европа комиссиясынын төрагасы менен жолугушту

17-сентябрда Европа союзуна жасаган расмий сапарынын жүрүшүндө президент Алмазбек Атамбаев Европа комиссиясынын төрагасы Жозе Мануэль Баррозуменен жолугушту. Анда Кыргызстан менен Европа комиссиясынын ортосундагы мамилелерди  мындан ары өнүктүрүү боюнча актуалдуу маселелер талкууланды. “Азыркы жолугушуу биздин өз ара мамилелерди чыңдайт. Кыргызстан -  Евросоюз үчүн Борбордук Азиядагы абдан маанилүү стратегиялык өнөктөш. Евросоюз экономикалык жана башка реформаларды жүргүзүү, көп партиялуу системди куруу боюнча Кыргызстандын  тандоосун жогору баалайт. Демократия орнотуу үзгүлтүксүз процесс. Мамлекетте мыйзамдын үстөмдүгү орнотулууга тийиш”,- деди Европа комиссиясынын төрагасы.

Өз кезегинде президент Алмазбек Атамбаев  Европа комиссиясынын  төрагасын Кыргызстанда  мыйзамдын үстөмдүгүн колдоо боюнча жаңы долбоорду ишке ашыргандыгы үчүн ыраазычылыгын билдирди. Мамлекет башчысы Жозе Мануэль Баррозуну Кыргызстанга ыңгайлуу учурда келип кетүүгө чакырды.