Эң кичүүсү 1 жашта болгон. Тажикстанда 30 жаштагы аял төрт баласын муунтуп өлтүрдү

Тажикстандын Хатлон облусунда 30 жаштагы аял төрт баласын муунтуп өлтүрдү. Бул тууралуу аталган өлкөнүн жергиликтүү маалымат булактары жазышууда.

Маалыматка ылайык, каргашалуу окуя 9-сентябрда чак түштө болгон. Өлкөнүн Ички иштер министрлиги бул фактыны тастыктап, учурда аял камакка алынганын билдирген.

"Аялдын аты-жөнү Назокатхон Т. Анын айтымында, окуядан эки күн мурун ал балдары менен агасынын үйүнө келген. Күйөөсү курулушта иштегендиктен, каргашалуу күнү күйөөсү үйдө болгон эмес. Балдар 10, 8, 4 жана 1 жашта болгон. Өз канынан жаралган чүрпөлөрүн өлтүргөн эне кылмышты дароо моюнуна алган.
Жаш энени мындай оор кылмышка түрткөн себептер азырынча белгисиз", - деп жазылат маалыматта.

Тажикстандын күч органдары, прокуратура тарабынан окуяга байланыштуу тергөө иштери жүргүзүлүп жатат.