Бишкекте аялын ажатканага камап, мыкаачылык менен сабаган окуя боюнча Бишкек ШИИББи билдирүү таратты

Бишкектеги "Алмалуу" кафесинде катуу ур-токмок менен аяктаган үй-бүлөлүк чыр болду. Бул тууралуу Бишкек ШИИББинин басма сөз кызматынан билдиришти.

Маалыматка ылайык, "Укук тартиби" рейддик иш-чарасынын алкагында көчөлөрдү кыдырып жүргөндө, милиция кызматкерлери 11-сентябрь күнү түн ортосуна жакын Курманжан датка жана Муса Жалил көчөлөрүнүн кесилишиндеги кафеде каламан мушташ болгон жерге барган. Милиция кызматкерлери окуя болгон жерге келгенде канжалаган аялды көрүшкөн. Ал күйөөсү тарабынан сабалганын айткан.

Анын айтымында, ал курбусу менен мекемеде отурганда күйөөсү кирип келген. Күйөөсү дааратканага алып барып, эшигин жаап, аялды катуу сабап салган. Жардам сураган кыйкырыктар жана ызы-чуу коноктордун жана кафе кызматкерлеринин көңүлүн бурган. Алар даараткананын эшигин ачууга аракет кылышкан, бирок жабырлануучунун күйөөсү аларга баары жайында экендигин айткан. Бирок ага карабастан кардарлардын бири эшикти талкалап ачканда, күйөөсү аялдын кекиртегине бычак такап турган. Кардар дароо аны уруп, милиция келгиче күйөөсү качып кеткен.

"Жабырлануучу Ш.А. күйөөсү Т.А.нын үстүнөн арыз жазуудан баш тартты.

Аталган факты Кылмыштардын жана жоруктарын бирдиктүү реестрине катталып, 75-берене (үй-бүлөлүк зомбулук) менен катталды. Керектүү экспертизалар дайындалып, сотко чейинки өндүрүш иши башталды", - дешти Бишкек ШИИББден.