Унаа дарыяга кулап, изделип жаткан таята менен небере. Ош ОИИБи окуянын чоо-жайын айтты

Ош облусунун Ноокат районунун Ак-Буура дарыясына түшүп кеткен унаа боюнча окуянын чоо-жайын облустук милициядан билдиришти.

Маалыматка ылайык, Ноокат районунун Күндү-Дөбө айылындагы унаа кырсыкка кабылган оор жүк ташуучу Хово үлгүсүндөгү унаанын айдоочусу качкан эмес. Hyundai Porter унаасы менен Хово унаалары кагышып, натыйжада Hyundai Porter Ак-Буура дарыясына кулап кеткен. Анын ичинде 3 адам келе жатканы такталган. Бул кырсык Кылмыштардын жана жоруктардын бирдиктүү реестрине катталган.

"Hyundai Porter үлгүсүндөгү унаа жайлоодон мал, ал эми Хово көмүр жүктөп келе жатышкан. Айдоочулар бир дөң жерден бири-бирин көрбөй калып кагышып кетишкен. Натыйжада Hyundai Porter артка кетип, анда Араван районунун тургуну түшүп калууга жетишкен. Айдоочу менен анын 4 жаштагы небереси мал менен кошо дарыяга кулап кеткен. Учурда таята менен неберени издөө иштери уланууда", - деди басма сөз кызматынан.

Ош облусунун Ноокат районунда 14-сентябрь күнү кечинде Ак-Терек-Папан-Кожокелең унаа жолунун 40-чакырымында Hyundai Porter үлгүсүндөгү унаа Ак-Буура дарыясына түшүп кеткен. Унаада 3 адам болгон. Алардын бири 1974-жылы туулган жаран аман калып, жолдо бара жаткан унаа менен Ош облустук ооруканага жеткирилген. Ал эми 1956-жылы туулган эркек киши жана 2016-жылы туулган бала сууга түшүп кеткендиги тууралуу маалымдалган.