"Окуучуларды тоого чыгууга мажбур кылган онлайн окуу". Аравандыктар бул көрүнүштүн видеосун жөнөтүштү

Ош облусунун Араван районуна караштуу Кара-Булак айылында жашаган окуучулар онлайн окууда түрдүү кыйынчылыктарга кабылып жатышат. Бул тууралуу SUPER.KG порталына Кара-Булак айылынын тургуну Гүлбарчын Абдижалил кызы билдирди.

"Араван районуна караштуу Кара-Булак айылы Ноокат районунун Тескей-Кожоке айылы менен чектешкен. Балдар Кара-Булак айылынан Тескей-Кожоке айылындагы Абдижалил Чынкараев орто мектебине келип билим алышат. Эки айылдын ортосундагы аралык 7 чакырым. Анын үстүнө жол жаман, тоого карай басышат. Транспорт маселеси чечилген эмес. Окуучулар жөө баргандыктан алардын коопсуздугу ойлондурат. Анткени тоо менен бара жатканда суу алып кетеби жана карышкырга туш болуп калабы деп коркобуз. Азыркы тапта онлайн окуу болгондуктан интернет биздин айылда иштебегендигине байланыштуу балдар 4-5 чакырым аралыкты басып өтүп, тоо бооруна чыгып окуп келип жатышат", - дейт Гүлбарчын Абдижалил кызы.

Кара-Булак айылында 4-класска чейин билим ала турган мектеп бар. Ал мектепте бир эле мугалим иштегендиктен окуучулар 5-6 чакырым аралыкты басып өтүп, кошуна айылдын мектебине барып билим алышат. Ал эми айылда интернет тартпагандыгына байланыштуу онлайн окууда толук кандуу билим ала албай жатышканын кошумчалай кетти окурманыбыз.