Дүйнөлүк саламаттыкты сактоо уюму Европада коронавирус кайрадан күчөп жаткандыгын эскертти

Дүйнөгө кулачын кеңири жайган коронавирус инфекциясы Европа чөлкөмүндө кайрадан күч алууда. Бул тууралуу Дүйнөлүк саламаттыкты сактоо уюмунун Европа бюросунун директору Ханс Клюге билдиргенин чет элдик басылмалар жазышууда.

"Учурда апта ичинде оорулардын саны Европада биринчи жолу пандемия туу чокусуна жеткен март айындагы сандардан ашып кетти. Аймактагы акыркы аптадагы эсептөөдө 300 миң учур аныкталды. Европа өлкөлөрүнүн жарымынан көбү акыркы эки аптада инфекциялардын 10 пайыздан ашык көбөйгөнүн билдиришти", - деген Клюге.

Ал белгилегендей, учурда илдет аныкталгандардын көпчүлүгү 25 жаштан 41 жашка чейинки курактагылар.

Улуу Британияда, Францияда жана Испанияда коронавирустун экинчи толкуну башталгандыгын жарыялаган. Бул өлкөлөрдө инфекциянын күн сайын рекорддук көрсөткүчү катталууда.