Өзбекстанда 19 жаштагы кыз үйлөнбөй койгон жигитинин унаасын өрттөп салды

Өзбекстандын борбору Ташкент шаарында 19 жаштагы кыз жигитинин унаасын өрттөп жиберген. Бул тууралуу аталган өлкөнүн Ички иштер министрлигине таянып, жергиликтүү басылмалар жазып чыгышты.

Маалыматка ылайык, кыз өрттөгөн унаа анын жигитине таандык болгон. Унааны өрттөөгө жигити үйлөнөм деп убада берип, сөзүнө турбай койгондугу себеп болгон.

19-сентябрда саат 04:10 чамасында ИИМдин нөөмөт бөлүмүнө калаанын 23 жаштагы тургунуна таандык Lacetti Jentra унаасы өрттөлгөндүгү тууралуу билдирүү келип түшкөн.

"Териштирүү учурунда С.Г. аттуу жаран жабырлануучу менен бир нече убакыт бою жакын мамиледе болгондугу аныкталды. Жигити ага келечекте үйлөнөм деп убада берген, бирок айткан сөзүнө турган эмес. Ызаланган кыз жигиттин унаасынын ичине жана сыртына бензин куюп өрттөп жиберген", - деп айтылат маалыматта.