Оштогу билим берүү уюмдары мамлекеттик тил күнүн онлайн белгилешти

Ош шаарындагы билим берүү уюмдары мамлекеттик тил күнүн онлайн белгилешти. Бул тууралуу Билим берүү жана илим министрлигинин басма сөз кызматынан кабарлашты.

Маалыматка ылайык, Ош облусундагы билим берүү институту тарабынан мамлекеттик тил күнүн утурлай, облустук иш-чара онлайн уюштурулуп, республикадагы жалпы билим берүү кызматкерлери катышып, интернет колдонуучуларга түз көрсөтүлүп турду.

"Кыргыз тили, биз үчүн бийик ордуң, Ала-Тоодой ар дайым бийик болгун!" аттуу иш-чаранын башында Ош билим берүү институтунун директору Гүлмира Турдубаева облустагы билим берүү кызматкерлерин мамлекеттик тил майрамы менен куттуктап, мамлекеттик тилди өнүктүрүү боюнча аткарылып жаткан иштерге токтолду.

"Иш-чаранын жүрүшүндө билим берүү жана илим министринин мамлекеттик тилди өнүктүрүү секторунун башчысы Гульнара Ибраимова сөз сүйлөп, өз ойлору менен бөлүштү. Муну менен катар президентке караштуу мамлекеттик тил боюнча Улуттук комиссиясынын Ош жана Жалал-Абад аймактары боюнча жооптуу өкүлү Алмагуль Телекманова да билим берүү кызматкерлерин мамлекеттик тил күнү менен куттуктап, мамлекеттик тилдин учурдагы абалы жөнүндө токтолуп өттү", - деп айтылат маалыматта.

Онлайн режиминде уюштурулган бул иш-чараны Ош облусунун бала бакчаларынын тарбиялануучуларынын жана мектеп окуучуларынын бийлери, алардын айткан "Манас" эпосунан үзүндүлөр жана тил боюнча көркөм окуулары коштоду.