Александр Лукашенкону Беларусь өлкөсүнүн президенти деп кайсы мамлекеттер тааныды? (тизме)

Беларусь өлкөсүндө 9-августта өткөн президенттик шайлоодо Александр Лукашенко шайлоочулардын 80 пайыз добушун алып, жеңишке жетишкен. Ал эми инаугурация аземи кечээ, 23-сентябрда Эгемендүүлүк сарайында болуп, Лукашенко расмий түрдө президенттик кызматына киришти. Бирок өлкөдөгү нааразычылык акциялары дагы да болсо токтой элек.

Аземден кийин АКШ баш болгон Батыш өлкөлөрү шайлоонун мыйзамдуулугун тааныган жок. Европанын бир катар өлкөлөрү Беларусь лидеринин инаугурациясын “жашыруун уюштурулган” деп сындап жатышат.

Ошол эле учурда Беларусь өлкөсүндөгү президенттик шайлоону өттү деп тааныган бир катар өлкөлөр бар. Айрым лидерлер Лукашенкону шайлоодо жеңишке жетип, президенттик кызматка киришкени менен куттукташкан. Беларусь өлкөсүндөгү президенттик шайлоону өттү деп Орусия, Түркия, Кытай, Армения, Сирия, Вьетнам, Венесуэла, Никарагуа жана Молдова тааныган.

Мындан тышкары Түркмөнстан, Казакстан, Өзбекстан, Кыргыз өлкөсү, Тажикстан жана Азербайжандын президенттери Александр Лукашенкону кайрадан шайланышы менен куттукташкан.