Орусияда көпүрө кулап, 49 Кыргыз жараны жаракат алды. Төртөөнүн абалы оор

Орусиянын Москва облусунун Ступино районундагы "ФМ Сидорово" логистикалык ишканасында жөө адамдар өтүүчү көпүрө кулап, 49 кыргыз жараны жаракат алды. Бул тууралуу Кыргыз өлкөсүнүн Орусиядагы элчилиги кабарлады.

Маалыматка ылайык, окуя бүгүн, 27-сентябрда болгон. Анда жаракат алган төрт кыргыз мигранты оор абалда ооруканага жеткирилген. Бактыга жараша, каза болгондор жок.

"Кырсык болгон жерде Орусиянын Өзгөчө кырдаалдар министрлигинин, тергөө комитетинин, прокуратуранын, "Тез жардам" кызматынын жана башка органдардын кызматкерлери иштеп жатышат. Кыргызстандын элчилигинин жана Ички иштер министрлигинин өкүлдөрү да Кыргыз жарандарына көмөк көрсөтүп, жабыркагандарга материалдык компенсация өндүрүп берүү үчүн ошол жерге барышты. Алдын ала маалыматтарга ылайык, аталган ишканада 169 Кыргыз жараны иштеп жаткан. Окуяны Кыргызстандын Орусиядагы элчиси Аликбек Жекшенкулов жеке көзөмөлүнө алган", - деп билдиришти басма сөз кызматынан.