Акыйкатчы Орусиядагы кесиптешине көпүрө кырсыгынан жабыркаган Кыргыз жарандарына колдоо көрсөтүүнү суранып кайрылды

Акыйкатчы Токон Мамытов Орусиянын адам укуктары боюнча ыйгарым укуктуу өкүлү Татьяна Москальковага көпүрө кырсыгынан жабыркаган Кыргыз жарандарына колдоо көрсөтүүнү суранып кайрылды. Бул тууралуу бүгүн, 28-сентябрда Акыйкатчы институтунун басма сөз кызматынан билдиришти.

Анда ал Москальковага Кыргыз жарандарына укуктук колдоо көрсөтүү жана социалдык төлөмдөр боюнча маселени өз көзөмөлүнө алуусун суранган. Мындан тышкары тергөө органдарынын күнөөлүүлөрдү аныктап, компенсация төлөнүшү керектигин белгилеген.

27-сентябрь күнү Москва облусунун Ступино районундагы "FM LOGISTIC" логистикалык ишканасында жөө адамдар өтүүчү көпүрө урап, 51 Кыргыз жараны жабыркаган. Анын ичинен жаракат алган төрт кыргыз мигранты оор абалда ооруканага жеткирилген. Бактыга жараша, каза болгондор катталган эмес.