Коронавирус күчөп жаткан Баткен облусунда илдет менен күрөшүү боюнча түшүндүрүү иштери жүргүзүлүүдө

Кечээ, 28-сентябрда өкмөттүн Баткен облусундагы ыйгарым укуктуу өкүлүнүн орун басары Чынара Саттарова Кадамжай районунун активисттери менен жолугушуп, аталган райондо эпидемиологиялык кырдаал күн сайын курчуп жатканын белгилеп, абалды турукташтыруу боюнча жетекчилерге тапшырмаларды берди. Бул тууралуу облустук администрациядан билдиришти.

Чынара Саттарова өз сөзүндө оорунун очогу болгон айылдарда, эпидемиологиялык изилдөөлөрдү жүргүзүү менен көзөмөлдү күчөтүү керектигин белгиледи.

Ошондой эле район активине эл арасында санитардык талаптарды сактоо боюнча түшүндүрүү иштерин күчөтүүнү, тынымсыз рейддерди жүргүзүүнү, эскертүү жана айып пул менен эле чектелбестен, баш ийбегендерге укук коргоо органдары тарабынан мыйзам чегинде, кылмыштардын жана жоруктардын бирдиктүү реестри боюнча иш алып барууну тапшырды.

Жыйындан соң Чынара Саттарова жарандардын коңшу өлкөлөр менен чек арада жайгашкан өткөрмө бекеттериндеги жаңы алгоритмге ылайык жүргүзүлүп жаткан иштерден кабар алды.

Белгилей кетсек, бүгүн, 29-сентябрда Баткен облусунда коронавирус оорусун жуктурган 55 жаңы учур катталган болсо, анан 41и Кадамжай районунан.