Бишкектеги №5 мектеп-лицейинин кошумча окуу корпусунун курулушу уланууда

Президент Сооронбай Жээнбеков бүгүн, 4-октябрда добуш бергенден кийин Бишкек шаарындагы А.Молдокулов атындагы № 5 улуттук инновациялык технологиялар мектеп-лицейинин кошумча окуу корпусунун жаңы имаратынын курулушунун жүрүшүн көрүп чыкты. Бул тууралуу президенттик аппаратынын маалымат кызматынан кабарлашты.

Маалыматка ылайык, президент Сооронбай Жээнбеков жаңы окуу корпусун курууда жана жабдууда билим берүү процессине заманбап, санарип технологияларын киргизүү шарттары эске алынышы керектигине токтолду.

"Өкмөткө караштуу Архитектура, курулуш жана турак жай-коммуналдык чарба мамлекеттик агенттигинин директору Урматбек Көкөчаров 375 орундуу, эки кабаттуу жаңы имараттын курулушун 2021-жылдын июнь айында аягына чыгаруу күтүлүп жаткандыгын белгиледи. Ошондой эле азыркы учурда окуу жүктөмдөрү көп болуп, окуучуларга орундар жетишпей жаткан жерлерде жаңы мектептерди жана кошумча корпустарды куруу иштери улантылып жатканын эске салды.

Мамлекет башчысы окуучуларды окутууда билим берүүдөгү алдыңкы тажрыйбаларды жана заманбап, санариптик чечимдерди колдонуунун өзгөчө маанисин баса белгиледи", - деп айтылат маалыматта.