Мэрия: "Бишкекте Ташкент-Сухэ-Батор көчөлөрү оңдолот"

Кытай Эл Республикасынын грантынын эсебинен "Көчө-жол тармагын өнүктүрүү" долбоорунун экинчи фазасы башталды. Бул тууралуу Бишкек шаардык мэриясынын маалымат кызматынан кабарлашты.

Маалыматка ылайык, биринчилерден болуп Ташкент көчөсү Турусбеков көчөсүнөн Тоголок Молдо көчөсүнө чейин жана Сухэ-Батор көчөсү Каралаев көчөсүнөн Шабдан Баатыр көчөсүнө чейинки бөлүгү оңдолот.

Жолдорду оңдоо иштери бүгүн, 5-октябрда башталды.

"Эки көчөдө жол катмары, жээк таштар, ирригациялык түйүндөр жана тротуарлар алмаштырылып, жаңыртылат. Реконструкция иштерин "China Road & Bridges Corporation" кытай компаниясы жүргүзөт. Реконструкция иштерине байланыштуу Ташкент көчөсүнүн Тоголок Молдо көчөсүнөн Исанов көчөсүнө чейинки жана Сухе-Батор көчөсү Каралаев көчөсүнөн Шабдан Баатыр көчөсүнө чейинки бөлүктөрү унаа кыймылы үчүн жабылат. Жолдорду оңдоо иштери күз айларынын соңуна чейин бүткөрүлөт", - деп айтылат маалыматта.

Эскерте кетсек, Бишкек шаарынын көчө-жол тармагын өнүктүрүү долбоорунун экинчи фазасы эки жылга эсептелген. Бул убакыттын ичинде калаада 5 көпүрөнүн курулушу жана жалпы узундугу 70 чакырым болгон 60 көчөнүн жолун оңдоп-түзөө пландалууда. Тизмедеги көпчүлүк көчөлөр кеңейтилип, кайрадан оңдолуп чыгат. Оңдоо иштери Кытай Эл Республикасынын гранттык каражатынын эсебинен жүргүзүлөт.