Сабырбек Жумабеков: "Ооруканага кайрылган бейтаптардын ичинен 88 кишиге операция жасалды"

Кечээ, 5-октябрда орун алган митинг башаламандыкка жетти. Башаламандыкта бир канча жарандар денесинен ар кандай жаракаттарды алышып, 1 жаран каза болду.

Бишкектеги Травматология жана ортопедия илим изилдөө борборунун башчысы Сабырбек Жумабеков аталган медициналык жайга 6-октябрь күнү саат 08:00гө карата 288 жаран кайрылганын билдирди.

"Ооруканага келген жабырлануучулардын 88ине операция жасалды. Анын 44ү аскер кызматкерлери. Ал эми калган 200 бейтапка биринчи медициналык жардам көрсөтүлдү. Биздин кызматкерлер түнү менен тыным албай иштеди. Кызматкерлер азыр деле иштөөнү улантып жатабыз", - деди ал.

Саламаттыкты сактоо министрлигинен 6-октябрь саат 08:00гө карата жалпы 590 жаран ар кандай жаракаттарды алып, борбор калаадагы ооруканаларга кайрылганын билдиришкен.