"5-каналды өзүбүздүн эле кесиптеш басып алуу аракетин көрүүдө" дейт каналдын кызматкери (видео)

5-каналды басып алуу аракеттери болуп жатат. Бул тууралуу SUPER.KG порталына аталган каналдын журналисти Исмат Ибрагимов билдирди. Айтымында, белгисиз топ директордун креслосун талашып, каналды басып алуу аракетин көрүп жатат.

"5-каналга өзүбүздүн эле кесиптештерибиздин бири баштаган топ келип, эч кандай көрсөтмөсү жок эле жетекчинин креслосун талашып, каналга жетекчи болом деп жалпы жамааттын арасында чыр чыгарды. Биздин жалпы жамаат ага каршы чыгып, биз өзүбүз каалаган гана жетекчи менен иштешебиз деп анын кадамын колдогон жокпуз. Кызматты тартып алууга аракет кылган адам менен бирге белгисиз, биз тааныбаган балдар да бар. Алар кадимкидей эле күчкө салып "мындай мыйзам жок, силер мыйзамдуу жолду күтүп олтурбагыла, азыр түздөн-түз басып алуу аракетин биз эч кимден сурабайбыз" дешүүдө.

Азыркы тапта каналда 70тей кызматкер иштейт. Кызматкерлер баарыбыз чогулуп, аларды каналдын ичинен сыртка сүрүп чыгардык. Бул учурда элдик кошуун бизге жардамга келишти.

Каналдын техникалары талкаланбашы үчүн аларды бир жерге жашырып, азыр сыртта суукта турабыз. Ал эми телеканалдын директору Эрнис Кыязов өз ордунда кадимкидей иштеп жатат", - деди Ибрагимов.