Министр Азамат Жаманкулов: "Митингчилер түндө биздин мекемеге келишип, ал жакты бошотууну, кызматты тапшырууну талап кылышты"

Талкуу жараткан маалымат боюнча министр Азамат Жаманкуловго байланышканыбызда көтөрүлүшчүлөр келип, кызматты тапшырып кетүүсүн талап кылганын айтат.

"Митинг болгон күнү мекемени кайтаруу үчүн министрликтин кызматкерлери калганбыз. Митингчилер түндө биздин мекемеге да келишип, бул жакты бошотуубузду, мага кызматты тапшырууну айтышты. Ортодо тартышуу болду. "Бизге тынчтык керек, кресло меники эмес, элдики" деп, кызматкерлер менен мекемеден чыгып кеттик. Андан кийин эле Курмангазы Азыкбаев министрдин милдетин аткаруучу болду деген кептер чыгып кетти. Көп өтпөй маданият өкүлдөрү чогулуп, ага мен да катыштым. Курмангазы Азыкбаев министрдин креслосун тартып алайын деген ою болбогонун, митингчилер мекемени талап-тоноп кетишпесин, көзөмөл кылып отуруңуз дегенинен келип отурганын айтты", - деди ал.